ओळखलंत का सर मला ?
पावसात आलं कोणी....
कपडे होते कर्दमलेले
केसांवरती पाणी
क्षणभर बसला , नंतर हसला …
बोलला वरती पाहून ….
गंगामाई पाहुनी आली ,
गेली घरट्यात राहून ……
माहेर वाशीण पोरीसारखी चार भिंतीत नाचली …..
मोकळ्या हाती जाईल कशी ??
बायको मात्र वाचली …….
भिंत खचली , चूल विझली , होते नव्हते गेले…….
प्रसाद म्हणून डोळ्यांमध्ये अश्रु थोडे ठेवले ….
कारभारणीला घेऊन संगे सर आता लढतो आहे……
चिखलगाळ काढतो आहे , पडकी भिंत बांधतो आहे…..
खिशाकडे हात जाताच हसत हसत उठला …..
पैसे नको सर , जरा एकटेपणा वाटला …..
मोडून पडला संसार तरी मोडला नाही कणा
पाठीवरती हात ठेऊन , फक्त लढ म्हणा......
फक्त लढ म्हणा......